HISTORIA LIBRI IV REGUM

CAPUT XXIV: De Joathan

#IV Reg. XV#Act. III#Nahum II#Nahum I

Anno secundo Phacee regis Israel regnavit Joathan filius Oziae in Jerusalem viginti quinque annorum erat cum regnare coepisset, et sedecim annis regnavit. Nomen matris ejus Jerusa, filia Sadoc. Et fecit bonum coram Domino, verumtamen excelsa non abstulit. Ipse aedificavit portam domus Domini sublimissimam, quam quidam putant turrim gregis. Haec est quae in Actibus apostolorum Speciosa dicitur, ab Hebraeis vocatur porta Joathan. Haec sola remansit in eversione facta per Chaldaeos. Hic devicit Ammonitas, et imposuit eis annuum tributum, talenta argenti centum et tritici decem millia coros, et totidem hordei. In diebus hujus, Rasin rex Syriae, et Phacee rex Israel, coeperunt infestare regnum Juda. Sub Joathan exortus est prophetare Nahum de Ecelsaei, de tribu Simeon, contra Ninivem praedicens: Haec dicit Dominus ad Ninivem: Exterminabo te, et nequaquam progredientes de te imperabunt mundo. Hieronymus dicit super Nahum, Herodotum dixisse, subversam Ninivem a rege Medorum tempore Josiae. De eversione quoque finali Ninive praedixit Nahum, quae facta est in hunc modum: Palus, quae circumdabat eam, superinundavit eam, facto pariter terrae motu, et igne de sublimi emisso, de qua inundatione videtur in libro scripsisse ibi: Inundans non faciet innocentem Dominus in tempestate, et turbine viae ejus. Tamen secundum aliam litteram legitur ibi: Mundans non faciet innocentem. Tamen librum suum scripsit post captivitatem decem tribuum sub Ezechia, dum vastaretur terra Juda ab Assyriis, in quo plenius prophetavit de destructione Assyriorum in consolationem gentis suae. Qui tandem mortuus est in terra sua in pace, et sepultus. Sub Joathan vidit Isaias Dominum sedentem, et seraphim mundavit labia ejus. Sub eodem exorsus est prophetare secundus Michaeas. Et mortuus est Joathan rex Juda, et sepultus est in civitate David, et regnavit pro eo filius ejus Achaz.